"So'n Si-kam Jen Ayshi La" (Ibaloy Poem)

"So'n Si-kam Jen Ayshi La"
Silver Pilo

Singen kakukip bengat da'y inka ayshi'm;
Naka'n ulay ishawshawat di kay udim;
Naka'n ulay mansasesked ni kaysesbi'm;
Ara! Pan uli kaga di, pangaasim.

Ensakit, tep egtaka mala un un-an;
Nganga'w shi dekna, ayshi la'y kasengkitan;
Ensakit ni ulay, 'kak polos egwatan;
No sina-shom singen p'yan taka ma'n dibkan.

Inakew, dinabi taka ka am-ampa;
'Kak unsalsheng balang no seshaken taka;
No ikimit ko'y matak, singen wara ka;
Nem ayshi, tinaynan jo kami gayam da.

Ensakit, singen kakshengan ma'n dubong ko;
Nem ayshi pesing, si-kato'y p'yan ni Apo;
Si-kam mango'n ulay i sasesmeken ko;
Wara ka'n ulay shiya nemnem tan puso.

Mga Komento

Mag-post ng isang Komento

Mga sikat na post sa blog na ito

“Kayebang” (Ibaloy Poem)

Imahe
PHOTO:  7,107 Islands One Nation “Kayebang” Silver Pilo Si-kam i kadkadwa nen lolang; Shi kanayon jen to ka-owang; Shi baley ayshi to inekhang; Tep napno ka’n mekan, kayebang. ‘Daga ka’d makneg jen kawajan; Sayno eshakel i may iyan; Dokto, kintoman jen may okhan; Sayno onpigsa kita mowan. Wara ka’n olay shi omaan; May ekad ka di’n edagitan; Nem napno ka ngo’n pansim-etan; No malebi'n mi pan okoban. Nem binma-deg kami ma niman; Tan kepsot mala’s lolang noman; Apil mala’y enpan-obdaan; Na-detan mala i omaan. Nem kar’ka on apos, kayebang; Ayshi khabol mika dibkhanan; ‘Shakel pay ali orishiyan; On-osal so’n si-kam, kayebang.
Magbasa nang higit pa

"Bosol" (an Ibaloy Short Story)

" Bosol " Written by Silver Pilo   "Beng...Beng...Banengbengbeng... Banengbengbeng...Tanak-i-tanak... Tanak-i-tanak...Tanong-nong-nong... Tik-titik-tik-tik...Titiktik-tik... Wao-hoy...Pinesbikan! Beng...Beng...Banengbengbeng... Banengbengbeng...Tanak-i-tanak... Tanak-i-tanak...Tanong-nong-nong... Tik-titik-tik-tik...Titiktik-tik... Wao-hoy...Salawasaw! ..." Eman-asil ira'y kinmanejang jen shep-ol shi shagem tep kaonsadasada ira'y totoo shima shontog jen napnowan ira ni shakel jen baay. Iraka onpalpalking ni khalsa tan iraka on banebanengbeng ni solibao khabol ni palado'n sakit nen Kumbabu. Si Kumbabu i kabaknangan, kala-ingan, tan ka-amaan jen too shiman jen shontog. Iraka onsedsedsed tan kaonpanapanadpad shima kabenawan jen bo-dayan shima awas ni ebadeg jen baley nen Kumbabu ni esolok mala jen enem jen akhew. Shaka pandikalikawi sota toktok ni too jen sha di inenop shima piig ali'n shontog say ma-ekhasan si Kumbabu'...
Magbasa nang higit pa

"Ngilin" (an Ibaloy Short Story)

Imahe
                                                                                  Photo by csaramir on flickr "Ngilin" Ipanmamo-ngay ni emaniyal jen sekhit shima bedalan ji wara ngo's Begdaw shima sheko emenedoysoy jen abos to. Egpayla-eng ekagashowa'y saloysoy nonta pilmiro'n sheko shima embanaw jen payew ji eman-ejos i empetang jen di-nget mayshokhi'd ma memapteng jen dopa to inkhatod ma makelting tan ebadeg jen bakdang to. Marama'y saloysoy to nonta wara ali inki-dengan to'n emankeshanegsheg ali'd ma shalan shi sa-pat, singa betik ni ebadeg jen baka. Minmo-ngay shima bel-ew i sakey bii'n inanbaro ni dibit jen edagitan tan emanka-oyos shima bakes to khabol ni kinapaspas ni betik to ali. Khabol ni inkakelshad nen Begdaw, insalsheng to'y sa...
Magbasa nang higit pa