"Dokto Shi Songsong Ni Sakey Bii'n Titit" (A Short Story)

Sakey ja memapteng jen agsapa waray empoti'n bii'n titit jen nanpa-tok shi panga ni sakey ekayang tan memajat jen kiyew. Engitngal si-kato ni ebadeg jen dokto shima enshokey tan makenteg jen songsong to. Idi eka-ekay wara ali ebadeg tan etoling jen aso eman-ekad nodta askhang nonta ebadeg jen kiyew.

'Naymaton jen naagang sota aso, piyan to'n shili'n mengan. Tinangkhak to sota bii'n titit jet inon-an to sota makopag jen dokto. 'Nanshogi'n inmayos i ilol shima nginma-ta jen bongot to.

Inpanposiposipos to'y nemnem to no to'y pesing to'n mengda nonta abebadeg jen dokto. Inkhatod waray ninemnem to...

"Bii'n titit", inkeljaw nonta aso. "Nimanak bengat jen mengoney ni marimarikit jen bii'n titit. Singa sabsabong shima pa-dok, emengab-abak i kinasiged to. Singen siyang ni sekhit no agsapa, akhakhanas i niyal to."

Minmamajat ngo'y dekna nonta bii'n titit singen emantejab shi dangit ima puso to khabol ni shadsak tan imdeng to ta naysemek nodta inkowan nonta aso.
Dinekna nonta aso jen na-shanan sota titit 'songa inparas to ma sota plano to.

"Jet amtak sesikhed metlang ita boses mo, shaket onkaka-jas pay i deknak no iki-dengan taka'n mankansiyon."

Khabol ta na-shanan jen pasiya sota titit tan piniyal to'n shagos i daki'n egto paylang am-amta, indokat to sota songsong to sayno man kansyon. Agto dinekdekna ji na-kas sota dokto shima songsong to khabol ta 'na-khas ngo'y dekna to tani piyal to nodta aso. Pilmi shadsak nonta aso. Sinbi ni ngi-shit to sota showa'n ebadeg jen tangoda to.

Inkimit nonta empoti'n bii'n titit i showa'n mata to khabol ta en-amis i toka pankankansiyon. Egto am-amta ji tinaynan sha la... In-oowapan shala... Dinoko ra... In-aw-awan sha gayam da...

Apaw noman i bii'n emiyal. Bii'n 'naysemBii'n tinaynan sha gayam bengat tep indara la'y kasepolan sha.

Songa si-kham jen bii karam shagos i-akan i piyal mo shi sakey daki'n egmo paylang am-amtan kusto. Karam i-agag i timpo no 'naysemek ka'n shagos. Karam koma itolok jen sata dokto bengat shi songsong mo i kasepolan nonta daki'n inmesop so'n si-kam. Jet no dinoko shaka, kosto ma. Enog ma. Say piyalen mo'n too ket aliwen sota onpiliw so nita dokto shi songsong mo nodikket sota too'n mengi-shom pay ni na-na-jew jen mekan shi damisaan mo.

...