Ibaloy Literature

"Si-kam" Silver Pilo Kamo'n boboja-en ko ima shanom shima patadan; Naka i-arig shi semek ko'n si-kam jen eg polos ma-tiyan; Etaltalna, memapteng, sasiked jen pan nengoyan; Memajat singen si-kam, akekanas jen ma-onon-an. Palado ta ngi-shit mo, toka pesimit i shadsak ko; Singa ak nak-kit jen sabsabong ja biniyag nita ngi-shit mo; Karkaro ita shemang mo ja kaskasmek jen ultimo; Shakita ka pekaljap shi shagem, toka popojaka'y puso. Singa ka'n talaw shi naykayang jen maniyal i silew to; Anken waraak shi embolinget, wara ka'n kaon sa-jok si-kak so; Anken naybetaw ka singen wara ka metla-eng shi askang ko; Wara ka'n ulay shi nemnem ko, wara ka'n ulay shiya puso. Ka-on du-nas i nandikmot ko no wara ka'd askang ko; Ka-on siged i epenasjas ni shagem no si-kam i kasengo; Sina-shom naka nemnema no anghel ka nga agpayso; Ayshi eshom jen nak ikowan, nay anak ka talaka'n gowapo!

"So'n Si-kam Jen Ayshi La" Silver Pilo Singen kakukip bengat da'y inka ayshi'm; Naka'n ulay ishawshawat di kay udim; Naka'n ulay mansasesked ni kaysesbi'm; Ara! Pan uli kaga di, pangaasim. Ensakit, tep egtaka mala un un-an; Nganga'w shi dekna, ayshi la'y kasengkitan; Ensakit ni ulay, 'kak polos egwatan; No sina-shom singen p'yan taka ma'n dibkan. Inakew, dinabi taka ka am-ampa; 'Kak unsalsheng balang no seshaken taka; No ikimit ko'y matak, singen wara ka; Nem ayshi, tinaynan jo kami gayam da. Ensakit, singen kakshengan ma'n dubong ko; Nem ayshi pesing, si-kato'y p'yan ni Apo; Si-kam mango'n ulay i sasesmeken ko; Wara ka'n ulay shiya nemnem tan puso.

PHOTO:  7,107 Islands One Nation “Kayebang” Silver Pilo Si-kam i kadkadwa nen lolang; Shi kanayon jen to ka-owang; Shi baley ayshi to inekhang; Tep napno ka’n mekan, kayebang. ‘Daga ka’d makneg jen kawajan; Sayno eshakel i may iyan; Dokto, kintoman jen may okhan; Sayno onpigsa kita mowan. Wara ka’n olay shi omaan; May ekad ka di’n edagitan; Nem napno ka ngo’n pansim-etan; No malebi'n mi pan okoban. Nem binma-deg kami ma niman; Tan kepsot mala’s lolang noman; Apil mala’y enpan-obdaan; Na-detan mala i omaan. Nem kar’ka on apos, kayebang; Ayshi khabol mika dibkhanan; ‘Shakel pay ali orishiyan; On-osal so’n si-kam, kayebang.

"Ayshila Sota Bongdol" (The Rainbow is Gone) No wara'y bongot ni bel-ew, 'shakel i isho-pet to; 'Shakel i iriri to jen kedagdag-a ni totoo; Shontog jen nontan na-na-jew i binmengis si-kato; Baley ni kilakilasi'n pinalsowa nen Apo. Abong ira ni olsa tan wakkes inomas shala; Kadasan jen egmebidang, niman emokdangan da; Shinangshangkhasan sha jet si-khato'y inbakbaknang sha; 'Shadsak enan ira ji ma'y shontog emansesaya. Eman-ing-ing ima titit ayshi enan da'y abong to; Kino-ko-taban da'n bulldozer ima baley to ngo; 'Manbadeg, emanshekel enan i khameng ni too; Kasa-dat to'y inkareshal ni keshonshontog tayo. Sama shanom shi balenay jen nontan ket nangoyan; Edo-do-shis, ekilot, ngangaaw shili'n ma-on-an; Paideng, tingey, kha-dang, siged ira'n meboja nontan; Nem dogit jen emankalkaljap i wara da niman. Singen bongdol, sesiked i nandikmot tayo nontan; Na-na-jew i maysi-nang, emin mayat jen maon-an; Ensaki...

“Jet Ibulos Taka Ma” Silver Pilo Inpanbalibaliktad ko mala’y dubong ji ayshi; Ayshi met gayam kaka da may-eshawi; Emay-eshawi puso’m anken naka maysesbi; Emaysesbi mango’y semek nem moka tengdawi. Nem mebedin emo mango jen ikitnal ko; Ikitnal ko’y aliwen ensakit shiya puso; Puso’n eman-nengis, puso’n sinekitan mo; Sinekitan mo jet sa-jokim ka ngo. Nem pasinsiya to-ka no nabnabdey ka ma; Nabdey ka ma ni anu-anos so niyay jen dekna; Dekna’n ‘nay-aw-awan, dekna’n egnaykekara; Egnaykekara’n semek, egnaykekara’n sinmek taka. Singa nanpolak ni banag jen aliwen para’n si-kak; Pa-jangoda’n sinpol ko, aliwa gayam jen kokowak; Banag jen sinsinmek ko met nem nginaaw towak; Tep shima puso to wara gayam day engabak.