Ibaloy Literature

“Nonta Kaaaneng Ta” Paspas gayam i akew, ‘nan-oney kita mowan; Ebayag nonta ka-onoran jen ta inpan-oniyan; Egka nanbado, kaskasmek ka ladta’n ma-onan; Gowapo ka payla-eng, nem egtaka kaya’n a-sopan. Eshakel da’y am-amtam, eshakel da’y barkadam; Piyan ko’n on esop nem shakel da’y inmesop si-kam; Singa pigan bengat nonta si-kata’y sanka-ay-ayam; Nonta kaaneng ta’n si-kak bengat kadkadwam. Ekak amta no imatonan towak payla-eng nita deknam; Ekak pay amta no wara da’y maka ko-jen so’n si-kam; Nem ayshi koma, say wara’y kanas ni nak nansekeshan; Ekak nangnap ni eshom tep amtak man oney kita mowan. Piyan ko’n i-oli sota tempo jen inpankai-kait ta; Sota akew ira’n si-kak tan sikam bengat i wara; Anken ootik bengat jen oras mantetbal kita koma; Mengshewak ni oras mo sakbay jen on betik ka. Amtak na-omesak jen shili’d ta nemnem mo la; Dinibkan mo pay emo no to’y nan am-amtaan ta; Nem man adibay kita koma mowan singa nontan da; Anken sandabi bengat singa nonta kaaneng ta

“Sulat Ni OFW” Manipod ni intongaw ko’d eroplano; Ayshi nak ninemnem nodiket si-khayo; ‘Kak paydang minotok iya dinawan ko; ‘Naysay-anak pangkhap ni sepi’n mapedalo. ‘Kak polos khinosto’n on-arawi’n si-kayo; Nem kasepolan ko met shili ja mandagbo; Piyan ko’n ewatan jowak koma mango; Tep ayshi piyan ko nodiket pansigshan jo. Dinawi’n si-khayo’y naka nemnemnema; Inakhew jen si-kayo’y naka ena-enapa; Emay-enos ankhen edigat mango’y obda; Si-khayo ladta’y emengipagpigsa’n ja dekna. Amtak ‘shakel metlang problema jo’dtan; Nem aanosiyo nin no ayshi-ak shitan; Jet pasinsiya no egtakejo kaya’n a-sopan; Pasinsiya no ayshi ak shitan ja mengajowan. Ekak amta’y emapesapesamak shitan; ‘Kak amta no ngento’y dagen jo nem kabasan; Nem say amtak on-oli ak da ngoreshan; Wara ngo reshan i tempo’n tayo panshadsakan.

"Puso ni Esakitan" Silver Pilo Ngentoy ngatan emay sesmek paylang i puso; Shi aliwen kosto'n oras, aliwen kosto'n tempo; Shi aliwen kosto'n dogad, aliwen kosto'n too; Shi too'n eg ipalobos ni dangit, shi too'n inges to. Ngentoy emo eshan kasepolan jen ma-am-amta; I sakey too'n taynan toka gayam metlang da; Tep wara gayam enan da'y kajem to la; Ji egmo paylang inpa amta'y moka dekdekna-a. Ensakit, singen sakit ni atong ni sekit shi omaan; Arig to'y deptok ni egni ni da-do'd bajo-an; Abak to'y sepdat ni ma-estara'd iskwedaan; Abak to'n emin, singa dobong ko'y 'nan siri-jan. Ngentoy, ngentoy reshan si-kam i 'nay semekan; En tinoshongan, en na-ulawan, en tinongayan; Ni puso'n kakaasi, puso'n etaynan, puso'n esakitan; Puso'n 'nay aw-awan, puso ni too'n asakisakitan.

“Aliben Semek Met Ma Iyay” Silver Pilo Kowan ko nem si-kham ladta; Kowan ko nem si-kham ni olay; Nem ayshi met day naka deknaa; Aliben semek met ma iyay. Kino-jen mo`n emin i wara`n si-khak; Nem egmo pinagan-anon emin; In awat ko`y kayak ja i-akan jen shadsak; Nem so`n si-kham, talakha`n ag mabedin. Emin-ano ak ja nan oli`n si-kham; Balang no pekhan-ano en mowak; Nem ayshi, makenteg shili ta deknam; Ayshi la`y biyang mo`n si-khak. Egmay pidit noman no talaka`n eg mabedin; `Songa emo sinmarot mala`y puso; Piyan niya epa-ey ja puso`n dibkhan ja emin; Jet ma-ewatan nalang i agpayso.

“Eskweda Ka!” Silver Pilo Singa kaka anka man basura ni pilak; Khabol nita okdong mo ni adak; Egka anka on dekna ankhen pinsak; Tep apil anka`y piyan mo`n shadsak. Ka-on kowa kowed si nanang mo‘d omaan; Eman dikhat si tatang mo`d obdaan; Ji apil anka`y moka dagdag-a, dangadangan; Singa inomas mo la`d ta nemnem mo`y eskwedaan. Barkadam enkay khait mo inkhato`d daam; Inbiyang mo la anka`y dekna ni pamiljam; Digat enan i keda-da-kami so`d amam nen inam; Moka bengat penamnam-ayi digat sha so`n si-kham. Nongay si-kham ngo di wara`y anak to`n satan; Sigurado ka ngata`n egka ngo di mesekisekitan; Nem no niman egka paylaeng may nemneman; Onmotok ngo reshan i tempo`n mo panbebawi-an.